ಜನರ ಹಿತದ ಹೋರಾಟಗಾರ: ಮುದ್ರಾಡಿ ಮಂಜುನಾಥ ಪೂಜಾರಿ

 ✍️ ಚೈತ್ರ ಕಬ್ಬಿನಾಲೆ

ಜನರ ಹಿತದ ಹೋರಾಟಗಾರ: ಮುದ್ರಾಡಿ ಮಂಜುನಾಥ ಪೂಜಾರಿ!

ಮುದ್ರಾಡಿಯ ಮಣ್ಣಿನಲ್ಲಿ ಹುಟ್ಟಿ ಬೆಳೆದ ಮಂಜುನಾಥ ಪೂಜಾರಿ ಅವರು ಕೇವಲ ಒಬ್ಬ ವ್ಯಕ್ತಿ ಅಲ್ಲ, ಹೋರಾಟದ ಪ್ರತಿಧ್ವನಿ, ನಿಷ್ಠೆಯ ಪ್ರತಿರೂಪ, ಜನಸೇವೆಯ ಕಾವ್ಯ.

ಉಡುಪಿಯ ಹೆಬ್ರಿ ತಾಲೂಕಿನ ಬಾಚಿಮಜಲು ಅವರ ಜನ್ಮಭೂಮಿ. ತಂದೆ ದಿ. ಚಂದು ಪೂಜಾರಿ, ತಾಯಿ ಕಮಲ ಚಂದು ಪೂಜಾರಿಯವರ ಜೀವನವೇ ಸಾರ್ವಜನಿಕ ಸೇವೆಯ ದಾರಿ ತೋರಿಸಿದ ಪಾಠಶಾಲೆ. ತಂದೆ ಮಂಡಲ ಪಂಚಾಯತ್ ಸದಸ್ಯರಾಗಿದ್ದವರು. ತಾಯಿ 10 ವರ್ಷಗಳ ಕಾಲ ಪಂಚಾಯತ್ ಸದಸ್ಯೆಯಾಗಿದ್ದವರು. ಹೀಗೆ ಜನಸೇವೆಯ ಮಣ್ಣಲ್ಲಿ ಬೆಳೆದ ಮಂಜುನಾಥ ಪೂಜಾರಿಯವರ ಹೃದಯದಲ್ಲಿ ಹೋರಾಟದ ಜ್ಯೋತಿ ಬಾಲ್ಯದಲ್ಲೇ ಬೆಳಗಿತ್ತು.

1980ರ ದಶಕದಲ್ಲಿ ಹೆಬ್ರಿಯ ಗ್ರಾಮಗಳು ಕಾರ್ಕಳ ತಾಲೂಕಿಗೆ ಸೇರಿದ್ದಾಗ, ಅಭಿವೃದ್ಧಿಯ ಕನಸುಗಳು ಮಂಕಾಗಿದ್ದವು. ಆದರೆ ಮಂಜುನಾಥ ಪೂಜಾರಿ ಮೌನವಾಗಿರಲಿಲ್ಲ. ಅವರು ಜನರ ಹಿತಕ್ಕಾಗಿ ಧ್ವಜ ಹಿಡಿದರು. “ಹೆಬ್ರಿಗೆ ತಾಲೂಕು ಬೇಕು” ಎಂಬ ಧ್ವನಿ ಅವರ ಶ್ವಾಸವಾಗಿಬಿಟ್ಟಿತು. ಮಕ್ಕಳಿಂದ ಹಿರಿಯರ ತನಕ ಎಲ್ಲರನ್ನು ಒಗ್ಗೂಡಿಸಿ, ಧರಣಿ, ಪ್ರತಿಭಟನೆ, ಪತ್ರಿಕೆ, ಸಭೆ ಹೀಗೆ ಎಲ್ಲಾಮಾರ್ಗಗಳನ್ನು ಬಳಸಿ ಸರ್ಕಾರದ ಕಿವಿಗೆ ಕನಸಿನ ಧ್ವನಿಯನ್ನು ತಟ್ಟಿದರು.

ಶಾಸಕರಾದ ವೀರಪ್ಪ ಮೊಯ್ಲಿಯವರು ಸ್ಥಳಕ್ಕೆ ತಕ್ಷಣ ಬರುವುದಿಲ್ಲವೆಂದು ಹೇಳಿದಾಗ, ಮಂಜುನಾಥ ಪೂಜಾರಿ ತಮ್ಮ ಹೋರಾಟದ ಹಠವನ್ನು ತೋರಿಸುತ್ತಾ “ತಾಲೂಕು ಘೋಷಣೆ ಮಾಡದೇ ನಾವು ಹೆಬ್ರಿಗೆ ಕಾಲಿಡುವುದಿಲ್ಲ” ಎಂದು ಮಾಡಿದ ಶಪಥ ಇಡೀ ಆಂದೋಲನಕ್ಕೆ ಜೀವ ತುಂಬಿತು. ಕೊನೆಗೂ ಜನಶಕ್ತಿ, ಅವರ ಧೈರ್ಯ ಮತ್ತು ಅಚಲ ನಂಬಿಕೆಯ ಮುಂದಾಳತ್ವದಿಂದ ಹೆಬ್ರಿ ತಾಲೂಕು ಘೋಷಿಸಲ್ಪಟ್ಟಿತು. ಇದು ಕೇವಲ ಒಂದು ಆಡಳಿತಾತ್ಮಕ ನಿರ್ಧಾರವಲ್ಲ, ಇದು ಜನರ ಹೋರಾಟದ ಗೆಲುವು, ಮಂಜುನಾಥ ಪೂಜಾರಿಯವರ ಸಂಕಲ್ಪದ ಚರಿತ್ರೆ.

ಗ್ರಾಮ ಪಂಚಾಯತ್ ಅಧ್ಯಕ್ಷರಾಗಿಯೂ, ಜಿಲ್ಲಾ ಪಂಚಾಯತ್ ಸದಸ್ಯರಾಗಿಯೂ ಅವರು ಸದಾ ಹಳ್ಳಿಗಳ  ಕಷ್ಟ-ಸುಖಗಳಲ್ಲಿ ಜೊತೆ ನಿಂತರು. ಹುಲಿ ಯೋಜನೆ, ಡಿಮ್ಡ್ ಫಾರೆಸ್ಟ್ ಸಮಸ್ಯೆ, ರಸ್ತೆ, ನೀರು, ಆರೋಗ್ಯ, ವಿದ್ಯಾಭ್ಯಾಸ ಹೀಗೆ ಪ್ರತಿ ಹೋರಾಟದಲ್ಲಿಯೂ ಅವರು ಧೈರ್ಯದಿಂದ ಜನರ ಪರ ನಿಂತರು.

ಅವರ ಸೇವೆಗಳು ಸಾಂಸ್ಕೃತಿಕ ಕ್ಷೇತ್ರಕ್ಕೂ ಹರಡಿದವು. ದಸರಾ, ಗಣೇಶೋತ್ಸವ, ಸಾರ್ವಜನಿಕ ಉತ್ಸವಗಳನ್ನು ಅವರು ನವ ಚೈತನ್ಯದಿಂದ ಕಟ್ಟಿದರು. ಹಳ್ಳಿಯ ಸಂಸ್ಕೃತಿ ಉಳಿಯಲೆಂದು ದೇವಾಲಯಗಳ ಜೀರ್ಣೋದ್ಧಾರ, ದೈವಸ್ಥಾನಗಳ ಪುನರುಜ್ಜೀವನದಲ್ಲಿ ಅವರು ಅಗ್ರಗಣ್ಯರಾದರು.  

ಗುರು ರಕ್ಷಾ ಚಾರಿಟೇಬಲ್ ಟ್ರಸ್ಟ್ ಆರಂಭಿಸಿ ಯುವಜನತೆಗೆ ಶಿಕ್ಷಣವೇ ಶಕ್ತಿ ಎಂದು ಬೋಧಿಸಿ, ವಿದ್ಯಾರ್ಥಿಗಳಿಗೆ ವಿದ್ಯಾರ್ಥಿವೇತನ, ಸಾಂಸ್ಕೃತಿಕ ಕಾರ್ಯಕ್ರಮಗಳಿಗೆ ಪ್ರೋತ್ಸಾಹ, ಯುವಕರಿಗೆ ಸಕಾರಾತ್ಮಕ ದಾರಿತೋರಿಸುವ ಕೆಲಸ ನಿರಂತರವಾಗಿಸಿದರು. ಕೊರೋನಾ ಸಮಯದಲ್ಲಿ ಆಹಾರ ಕಿಟ್, ಉಚಿತ ಔಷದಿಗಳು, ಕೋವಿಡ್ ನಿಂದ ಸಾವನ್ನಪ್ಪಿದ ಅದೆಷ್ಟೋ ಕುಟುಂಬಗಳಿಗೆ ಧನ ಸಹಾಯ ಮಾಡಿದ ಮಾನವೀಯತೆಯ ಘಟನೆಗಳು ಅವರ ಹೃದಯದ ದೊಡ್ಡತನವನ್ನು ತೋರಿಸಿದ್ದು ಇಂದಿಗೂ ಬಡವರ ಕಣ್ಣುಗಳಲ್ಲಿ ಆ ಪ್ರೀತಿಯನ್ನು ನಾವು ಕಾಣಬಹುದು. 

ರಾಜಕೀಯದಲ್ಲಿ ಅವರು ಗೆಲುವು-ಸೋಲಿಗಿಂತ ನಿಷ್ಠೆ-ಪ್ರಾಮಾಣಿಕತೆಯನ್ನೇ ದೊಡ್ಡದಾಗಿ ಕಂಡವರು. ಶಾಸಕರ ಹುದ್ದೆಗೆ ಟಿಕೆಟ್ ಸಿಗದಾಗ ಕುಗ್ಗದೆ, ಹೆಬ್ರಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷರು ಸ್ಥಾನಕ್ಕೆ ರಾಜೀನಾಮೆ ನೀಡಿ ಕರ್ನಾಟಕವೇ ನಿಬ್ಬೆರಗಾಗುವಂತೆ ಮಾಡಿದ ನಿಷ್ಠಾವಂತ. ಗೆಲುವಿನಲ್ಲಿ ಗರ್ವವಿಲ್ಲ, ಸೋಲಿನಲ್ಲಿ ನಿರಾಶೆಯಿಲ್ಲ, ದ್ರೋಹದ ನೆರಳೂ ಇಲ್ಲ. ಇವೆಲ್ಲಾ ಗುಣಗಳು ಅವರನ್ನು ನಿಜವಾದ ನಾಯಕನನ್ನಾಗಿ ಮಾಡಿವೆ.

ಮುಂಬೈ ಕನ್ನಡಿಗರಿಂದ ದೊರೆತ ‘ಸಮಾಜ ಸೇವಾ ರತ್ನ’ ಪುರಸ್ಕಾರ ಅವರ ಸೇವಾ ಪಥದ ಚಿನ್ನದ ಅಕ್ಷರ. ಬ್ರಹ್ಮಶ್ರೀ ನಾರಾಯಣ ಗುರು ಸಂಘದಲ್ಲಿ 17 ವರ್ಷಗಳ ಕಾಲ ಅಧ್ಯಕ್ಷ, ಗೌರವಾಧ್ಯಕ್ಷರಾಗಿ ಸೇವೆ ಸಲ್ಲಿಸಿದ ಇವರ ಬದುಕಿನ ಅತ್ಯಂತ ಶ್ರೇಷ್ಠ ಸಾಧನೆ ಎಂದರೆ ಕರ್ನಾಟಕ ಸರ್ಕಾರದ ನಾರಾಯಣಗುರು ಅಭಿವೃದ್ಧಿ ನಿಗಮದ ಪ್ರಥಮ ಅಧ್ಯಕ್ಷರಾಗಿ ಆಯ್ಕೆಯಾಗಿರುವುದು. ಇದು ಕೇವಲ ಹುದ್ದೆ ಅಲ್ಲ, ಜನರ ಹೋರಾಟ, ನಂಬಿಕೆ, ಪ್ರಾಮಾಣಿಕತೆಯ ಗೆಲುವಿನ ಪ್ರತೀಕ.

ಇಂದಿಗೂ ಅವರು ಶ್ರೀ ಗುರುರಕ್ಷಾ ಚಾರಿಟೇಬಲ್ ಟ್ರಸ್ಟ್ ಮತ್ತು ಶ್ರೀ ಗುರುರಕ್ಷಾ ಸೌಹಾರ್ದ ಸಹಕಾರಿ ಸಂಘಗಳ ಮೂಲಕ ಸೇವೆಯನ್ನು ಮುಂದುವರಿಸುತ್ತಿದ್ದಾರೆ. ಹಣದ ಹಿಂದೆ ಓಡುವ ಕಾಲದಲ್ಲಿ, ಅವರು ಹೃದಯದ ಹಿಂದೆ ನಡೆದವರು. ಹಳ್ಳಿಗಳ ಅಭಿವೃದ್ಧಿ, ಮಕ್ಕಳ ವಿದ್ಯಾಭ್ಯಾಸ, ಪರಿಸರ ಸಂರಕ್ಷಣೆ, ಸಾಂಸ್ಕೃತಿಕ ಕಾರ್ಯ ಇವರ ನಿತ್ಯಸೇವೆಯ ದಾರಿಗಳು.

ಮಂಜುನಾಥ ಪೂಜಾರಿ ಮುದ್ರಾಡಿಯವರ ಬದುಕು ನಮಗೆ ಕಲಿಸುವ ಪಾಠ ಒಂದೇ. ಜನಸೇವೆಯ ದಾರಿ ಕಷ್ಟಕರವಾದರೂ ಶಾಶ್ವತವಾಗಿರುತ್ತದೆ. ಸಮಾಜಕ್ಕಾಗಿ ಹೋರಾಡಿದವರು ಸೋಲುವುದಿಲ್ಲ; ಜನಮನದಲ್ಲಿ ಬೆಳಗಿದ ಬೆಳಕು ಎಂದಿಗೂ ಆರದು ಎಂದು. 

ಹೆಬ್ರಿ ತಾಲೂಕು ಅವರ ಹೋರಾಟದ ಜಯಧ್ವನಿ, ನಾರಾಯಣಗುರು ಅಭಿವೃದ್ಧಿ ನಿಗಮದ ಅಧ್ಯಕ್ಷ ಸ್ಥಾನ ಅವರ ನಿಷ್ಠೆಯ ಪ್ರತೀಕ, ಜನಪ್ರೇಮ ಅವರ ನಿತ್ಯ ಶಕ್ತಿ.

ಇಂದು ಅವರ ಹೆಸರಿನಲ್ಲಿ ಬೆಳಗುತ್ತಿರುವ ಬೆಳಕು ಇನ್ನು ಮುಂದಿನ ಪೀಳಿಗೆಗೆ ದಾರಿದೀಪವಾಗಲಿ. ಕರ್ನಾಟಕದ ಇತಿಹಾಸದಲ್ಲಿ ಮುದ್ರಾಡಿ ಮಂಜುನಾಥ ಪೂಜಾರಿ ಜನರ ಹಿತದ ಹೋರಾಟಗಾರ, ನಿಷ್ಠೆಯ ನಾಯಕ ಎಂದು ಶಾಶ್ವತ ಗ್ರಂಥವಾಗಿ ಉಳಿಯಲಿ ಎನ್ನುವುದೇ ನಮ್ಮ ಹಾರೈಕೆ.

— ✍️ ಚೈತ್ರ ಕಬ್ಬಿನಾಲೆ